Ua faamavae ma le tofiga Peresetene o le taaloga Lakapi Liki a Samoa le afioga Tagaloa Faafouina Su’a, ma o le feiloaiga ma tusitala i le Aso Lua o le vaiaso nei na ia faailoa ai lana faaiuga, a o tapena ai le polokalame mo le tali faaaloalo a le Malo ma le atunuu i le malaga mai o le aulakapi liki o le Toa Samoa.
O le faamavae o Tagaloa Faafouina Su’a, o loo lotolotoi ai pea i le taimi nei i le faamaopoopoina o tapenaga mo le malaga mai o le Toa Samoa e pei ona ia faailoa le auiliiliina o le polokalame mo lea faamoemoe.
O le po anapo na taunuu le vaega muamua o le aulakapi liki a le atunuu, ae o le aoauli o le Aso Lulu lenei e taunuu ai le vaega lona lua ma o le faletalimalo o le Return to Paradise i Matautu i Lefaga o loo faamautu ai le ‘au atoa.
O tama e toafa o le ‘au o loo taaalo i kalapu i Egelani ua le mafai ona malaga mai, ona ua le fetaui ma fuafuaga o aso e amata ai a latou konekarate.
Ua faamautu mai e le teutupe a le pulega o le lakapi liki a le atunuu, o le seleni ua tauaao nei mai le TV ma le leitiofoni sa faia i le faaiuga o le vaiaso ua mavae e 227 afe tala, ae onosefulu afe tala le aofaiga o isi foai o loo tau faamaoopopo pea i le taimi nei, ma e le o taofia foi nisi e fia tuuina atu ni foai.
O le a lē malaga taamilo le Toa Samoa i nuu ma itumalo e pei ona sa iai se fuafuaga muamua, ae o le Aso Tofi le aso 29 o Tesema o le avanoa lea mo tagata uma i Upolu e fia feiloai i le Toa Samoa, e malaga mai ai i le polokalame o le a faia i lumāmaota o le Malo i le eleele fou.
O le aso foi lea o le a faia ai le solo poo le parade e amata mai i le auala laupapa sima i Vaisigano ma agai atu ai i lumāmaota o le Malo mo le sauniga o le a saunoa ai le taitai o le Malo le afioga i le tamaitai Palemia.
