E 99 sui o tautua tau puipuiga a Malo eseese ma setete o le Malo Amerika faatasi ai ma le Komesina ma le Minisita o le matagaluega o leoleo mai Samoa, sa auai i le uluai faatasiga i Uosigitone i Amerika talu  ai nei, ina ua mae’a ona faamautu se maliega a le auaunaga tau puipuiga a le setete o Nevada i Amerika ma le Matagaluega o leoleo, falepuipui ma le ola toe fuataina i lo tatou atunuu.

Ua faailoa i se pepa o faamatalaga faalauaitele o lea faatasiga muamua ua faia sa tapena e le matagaluega o le puipuiga a le Malo o Amerika i le faamoemoe e faasoa ma fetufaa’i silafia o tomai o galuega tau puipuiga o loo faatino e leoleo o atunuu mai le Pasefika e aofia ai Tonga, Fiti ma Samoa.

O se faatasiga foi sa auai sui o leoleo ma fitafita o le Malo o Amerika o loo fai paaga ma auaunaga tau puipuiga a le setete o Nevada lea sa malaga mai ni ona sui i Samoa i le amataga o le masina nei o Iulai ma sainia ai le maliega ma le Minisita o le Matagaluega o leoleo, falepuipui ma le ola toe fuataina le Afioga Faualo Harry Jeffrey Schuster.