O le sauniga a le Matāgaluega o Faamasinoga ma le Faafoeina o Matāupu Tau Faamasinoga i le Aso Gafua o lenei vaiaso na faamautū ai i le saunoaga a le afioga i le Faamasino Sili, afioga Satiu Simativa Perese le mālōlō litaea o le afioga i le faamasino sinia o le Faamasinoga Maualuga le afioga Vui Clarence Nelson i le masina o Iuni o le tausaga nei pe a mae’a le ono masina ua toe faaopoopo e galue ai, ina ua aulia tausaga o le soifua e faamuta ai lana galuega faa-faamasino.
O le ono masina ua faaopoopo o le a faamae’a ai matāupu uma tau faamasinoga o loo tauaveina e le faamasino sinia.
O le afioga Vui Clarence Nelson o le ulua’i faamasino o le Faamasinoga Maualuga a Samoa ua ia tauaveina le tofiga faamasino sinia lea ua aiaia i le tulafono faavae o le atunuu.
