O Samoa ua atoa iai le selau o atunuu ua faipaaga ma le setete o Nevada i Amerika lea ua aofia ai ma isi atunuu o le Pasefika e pei o Tonga ma Fiti.

O le tāua o le faigapaaga o le avanoa ai o ni fesoasoani mai lea setete mo lo tatou atunuu e auala mai i fesootaiga i mataupu tau i suiga o le tau ma le siosiomaga, o auaunaga e moomia ai fesoasoani i taimi o mala faalenatura, o le faamalosia o tulafono, ma le puipuiga o le saogalemu.

O le Minisita o le matagaluega o leoleo falepuipui ma le ola toe fuataina, faapea le minisita o le matagaluega o puna’oa faalenatura ma siosiomaga sa fai ma sui o le Malo o Samoa i le sainiga o le faiga paaga ma le amepasa poo le sui o le Malo o Amerika i lo tatou atunuu.

Na malaga mai le sui o le ofisa o le kovana o le setete o Nevada faapea le taitai o le fitafita a lea setete e molimauina le sainiga o pepa o le faigapaaga ua aiaia ai vaega o le a mafai ona fetufaaai ai Samoa ma lea setete faapea ai ma vaega o le a mafai ona fesoasoani mai ai i lo tatou Malo.

O le faaiuga o lenei vaiaso o le a faamautu ai foi se isi fesoasoani mai lea Malo tele o le lalolagi ua toe fausia ai se faaopoopoga o le falemai faaitumalo o loo i Faleolo faafesagai ma le malaevaalele faavaomalo o le tatou atunuu.

O le po foi o le Aso Tofi na faalauiloa ai e le amepasa o Amerika mo Samoa le susuga Tom Udall nisi o fesoasoani a lona Malo a o faamanatu ai le tutoatasi o Amerika i Samoa lea e pa’ū i le aso 4 o le masina o Iulai i tausaga uma.