I le tuanai o faatalanoaga ma feutanaiga i le va o le Matagaluega o Fesootaiga ma faamatalaga faatekonolosi a le Malo o Samoa ma le Matagaluega o Fesootaiga a le faigamalo a Tutuila ma Manu’a, o le sainia i le vaiaso nei o se maliega o se MOU poo le Memorandum of Understanding, ua faamautu ai ma le galulue faatasi o auaunaga nei a Malo e lua e faaleleia tulaga uma i lea auaunaga e pei o le laina o fesootaiga le broad band.
O se tasi lea o mataupu tāua sa soalaupule i talanoaga o le Atoa Samoa talu ai nei, lea ua faaalia o le a le gata ina galulue faatasi Amerika Samoa ma Samoa Tutoatasi i le faaleleia o fesootaiga, ae o le a fefaasoa a’i foi tomai aoaoina i le siitia o vaega tau i galuega inisinia mo fesootaiga ina ia mafai ona foia faafitauli e aafia ai lea tautua i nisi o taimi.
O le minisita o fesootaiga ma faamatalaga tekonolosi le afioga Toelupe Poumulinuku Onesemo ma le Faatonu poo le faauluuluga o auauanaga tau fesootaiga a Amerika Samoa susuga Falelimu Chuck Leota na sainia lea maliega i Apia i le vaiaso nei.
