Ua faailoa nei e le Faletupe o le Atinae o Asia le faamautū ai o se maliega ma le faalapotopotoga o le malosi’aga tau eletise le EPC, i le faamoemoe e lagolago e lea faletupe le faatutūina o ni nofoaga e maua ai le eletise mai le lā, i motu o Upolu ma Savaii.
O se fuafuaga foi o le a fausia ai ma se nofoaga e tuu iai maa e maua ai le uila mai malosi faafouina tau eletise ma o le a saga siitia ai le eletise e maua mo le faaaogāina i le atunuu.
Ua fuafua e ta’i 40 mekauati o le eletise e maua mai i ia taumafaiga e lua, lea o loo taula’i i le fuafuaga e ausia e Samoa le 70 pasene o malosi tau eletise e maua mai malosi’aga faafouina poo renewable energy i le tausaga e 2031.
O le aso 6 o Tesema na sainia ai le maliega i le va o sui o lea faletupe ma ofisa sinia e aofia ai se loia o le faalapotopotoga o le malosi’aga tau eletise.
O le Faletupe o Atina’e o Asia o le a feagai ma le faasoaina mai o seleni, faapea le tusia o ata o ia galuega ma le fausia o le auivi e lima ta’ita’iina ai le faagasologa o galuega o ia atina’e tau malosi’aga faafouina.
Mo le silafia o le taimi nei o le 69 pasene o le eletise o loo gaosia i Samoa ma faasoasoa atu i le atunuu o loo maua mai i suāuu e faatau mai fafo.
