Ua ausia e Samoa se tasi o matati’a tāua i le atina’eina o le ola mālōlōina, ma le a’oa’oina lelei o fanau i le vaega tau amata poo le early childhood, ina ua faamautū ai e le malo o Samoa le faavae e lima ta’ita’iina ai le atina’e, a’oa’oga ma isi vaega tāua uma e pei o le ola saogalemu o fanauiti a le atunuu.
O le faamautū ai o lea faavae ua avanoa ai ma le faatūina o se komiti faufautua poo se advisory board latou te mata’itūina le tulaga solo lelei o le faatinoga o aiaiga uma o lea faavae mo le atina’e o fanau i le vaega tau amata.
Ua aofia i le komiti faufautua nisi o matagaluega a le malo e pei o tinā ma tamaitai atina’e o afio’aga ma agafesoota’i, matagaluega o a’oga ma aganuu, matagaluega o le soifua mālōlōina, le matagaluega o tupe, ma le matagaluega o puna’oa faalenatura ma siosiomaga.
O le latou pitolaau o le mata’itū o le tulaga o iai le soifua manuia ma le soifua mālōlōina o fanauiti faapea le itu i a’oa’oga ma le ola saogalemu o fanau.
Ua fetaui le faamautū o le faavae e faatino ai lea galuega ma le talimalo o Samoa i le masina o Me o le tausaga nei i le fono a atunuu o le Pasefika o le a talanoaina ai le tulaga o iai le atina’e o fanauiti i le vaega tau amata i totonu o atunuu ta’itasi o le Pasefika e pei o Samoa.
Ua faafetaia ai e le Minisita o Tina ma Tamaitai Atina’e o Afioaga ma Agafesoota’i le faalapotopotoga o le UNICEF i le fesoasoani ua mafai ai ona ausia e Samoa se isi laasaga maualuga i le fausia o le faavae o le atina’e o fanauiti.
