Ua faamautū nei le avanoa o le ‘aulakapi liki a tamaitai o le atunuu le Fetu Samoa, i le taamilosaga o le Ipu o le Lalolagi i le tausaga fou, ina ua malolo ai le ‘au a tamaitai Fiti i le faai’uga o le vaiaso, ma manumalo ai le Fetu Samoa i le Ipu faaofuofu le bowl i le taamilosaga o le lakapi liki a le Pasefika.

E 14 ‘ai na manumalo ai le Fetu Samoa i le 12 a le Fiji Bulikula.

I taaloga faitaulia e lua a le ‘aulakapi liki a alii le Toa Samoa ma le ‘au a Egelani lea na to’ilalo i le Toa Samoa i le Ipu o le Lalolagi i le lua tausaga ua mavae, ae o le taaloga lona lua ma o le taaloga mulimuli foi lea a le ‘aulakapi liki a alii ma le ‘au a Egelani i le faai’uga o le vaiaso, ua toe manumalo ai Egelani i ai e 34 i le 16 a le Toa Samoa.

Na malolo foi le Toa Samoa i le taaloga muamua ma Egelani i lana malaga i Europa o lenei tausaga.