E le o toe mamao se taimi ona faatino lea o fuafuaga o le toe fausia o le maketi i Savalalo, ina ua faamautu le fesoasoani a le Malo o Niu Sila e 12 miliona tala tupe Niu Sila e maua ai se vaegatupe e tusa ma le 20 miliona tala Samoa, e faatino ai lea galuega.
Ua faaopoopo iai ma le 7 miliona tala Niu Sila o le isi fesoasoani a lea Malo e faatupe ai fuafuaga tau tupe a le Malo i lana tala o le tupe masani. A tuu faatasi ia fesoasoani e maua ai le 30 miliona tala Samoa.
O le asiasi mai o le tamaitai Minisita o le Va i Fafo o Niu Sila o Nanaia Mahuta i le vaiaso ua mae’a atu nei na faamautu ai ia fesoasoani tau tupe i se sainigalima ma le tamaitai Minisita o Tupe le afioga Mulipola Anarosa Ale Molioo.
E pei ona silafia o le toe fausia o le maketi i Savalalo o se fuafuaga a le faigamalo ua iai nei, i le silasila mamao i le manaoga o pisinisi laiti sa faafoe i le maketi tuai na faatamaia i le malaia, o se nofoaga e tu lata i le nofoaga faatali pasi e maua ai tagata faatau, toe afe gofie e le lautele o le atunuu mo faatauga.
O le toe fausia foi o lea maketi i le nofoaga sa iai muamua, ua tulimatai ai nei e le toatele o le atunuu le taimi e mae’a ai lea galuega, ma ni vaaiga i ni foliga fou o se maketi o le a fausia ai, aemaise o nisi o pisinisi ma isi auaunaga o le a faagaioia i lea nofoaga i totonu o le taulaga.
