Ua toe fā masina o loo totoe mae’a lenei tausaga ma o le faamanatu lea a le Malo e ala mai i le Minisita o Tina ma Tamaitai Atinae o Afioaga ma Aga Fesootai, i fono faavae a itumalo palota e lei tuuina atu vaega manaomia e tusa o le ta’iala o le poloketi tasi le miliona, mo le faamatuuina o vaegatupe o le miliona tala lona lua.
O Tesema o le tausaga nei e faamuta ai le avanoa mo le faamatuuina atu o vaegatupe o le miliona lona lua, ae mo fono faavae a itumalo faapalota o Aana Alofi Numera 4 ma Faasaleleaga Numera 2, o lea ua pasia e le Komiti Faafoe o le poloketi a latou lipoti ma fuafuaga o le faaaogāina o le isi miliona ma ua sainia nei a latou feagaiga ma le Malo e ala i le Matagaluega o Tina ma Tamaitai Atinae o Afioaga ma Aga Fesootai o loo vaaia le polokleti, faapea le matagaluega o tupe a le Malo.
Na faaalia e le Minisita o loo faauluulu iai galuega uma o le poloketi, ua faamatuu le ta’i 160 afe tala a ia fono faavae e lua, ma ua faamatuu foi iai ma le 420 afe o le vaega tupe muamua o le miliona lona lua.
I le saunoaga lava a le tamaitai Minisita o le Matagaluega o Tina ma Tamaitai Atinae o Afioaga ma Aga Fesootai o loo vaaia le poloketi o le miliona tala, na faailoa ai e le afioga Mulipola Anarosa Ale Molioo, ua 49 itumalo ua mae’a ona sainia maliega o le miliona lona lua ma ua faamatuu iai le ta’i 160 afe mo le faagaioia o ofisa o fono faavae.
O loo totoe ai nei itumalo e lua e lei faatinoina a latou maliega ona o loo faatali a latou lipoti ma fuafuaga o le ta’iala o atina’e mo le miliona lona lua.
E 48 itumalo ua faamatuu iai vaegatupe muamua o atina’e e 420 afe ae 6 itumalo ua mae’a faamatuu uma iai 840 afe faaopoopo iai le 160 afe o le faagaioia o ofisa o a latou fono faavae ona atoa ai lea o le latou ta’i miliona i le tufatufaga lona lua o miliona o lea poloketi a le Malo.
