Ua faamautinoa mai e le pulega a le Transpower, e leai se taui tupe toe totogiina mai ona o le pou eletise na pa’ū i Northland.
E faitau afe lea na motusia eletise i le masina o Iuni ina ua sese ona tatala gati o le pou eletise ma pa’ū ai.
O se mataupu na faatalosaga ai e tagata o loo nonofo i Matu o le atunuu faapea pisinisi, e tatau ona toe totogi mai e le Transpower latou ma o lea e faatusaina e oo atu i le $60 miliona le gau ona o le motusia o le eletise.
Peitai o lea ua faamanino e le sui o le pulega a le Transpower e leai se faamanuiaga faapea e mafai ona toe ofoina mai, ma e tatau ona faasagasaga talosaga nei agai i lana konekarate le Omexom lea na galulue i le pou.
E pau le itu ua faamautinoa mai e le Transpower o loo talanoa nei i nisi auala e fesoasoani ai i tagata Northland, peitai e lē o se fesoasoani e maua nei poo taeao, e faitau vaiaso e faatali ai.
Pe a tuu mai i pisinisi na aafia, ua manino le finagalo o le pule sili o le Transpower, John Clarke e leai se taui mo pisinisi.
Ae i se tala mai suesuega na faia faasaga i le aotelega o le mataupu lenei, o le taeao ananafi lea na faalauiloa ai le lipoti mai suesuega na faia ma o loo ta’ua ai o le tagata faigaluega e leai sona malamalamaga ma e le i iai foi se isi e faatonutonuina ana galuega lea na tatalaina gati e tolu i le taimi e tasi na mafua ai ona pa’ū le pou.
Puna o Faamatalaga: No compensation for Northland after pylon collapse, Transpower says | RNZ News
