O se tina 87 tausaga le matua mai le motu tele i Salafai i le itumalo o Faasaleleaga Nu 2, le tagata lona lua ua maumau le soifua ona o le faama’i o le Koviti19.

Na taofia lea tinā i le falema’i o Malietoa Tanumafili II i Tuasivi i le Aso Tofi  31 o Mati, 2022, ona o le ogaoga tele o aafiaga i lona alaea, e le gata i lea ua limonia, ma ua maua fo’i i le koviti.

Ua taua i le pepa o faamatalaga mai le Soifua Maloloina, o lea tina e leai ni ona gasegase tumau, peitai e le’i faia ona tui puipui o le Koviti.

E ui i taumafaiga a alii ma tamaitai fomai i le falema’i i Tuasivi,ae na maliu lava lea tina i le taeao analeila Aso Sa 3 Aperila, 2022

O le tinā ua maliu ua 2 ai e ua maumau le soifua i le atunuu ona o le Koviti19 talu ona pepesi i tua i le atunuu mai le aso 17 o Mati, 2022.

O le tamā mai Aleipata le maliu muamua i le atunuu ma e iai isi ona gasegase faapitoa. O loo faagasolo mai pea le polokalame a le Matagaluega ina ia faia tui puipui o i latou e lei faia, e aofia ai le tui muamua, lona lua ma le lona tolu.

O loo tuuina mai foi faamafanafanaga mai lo tatou malo i nai aiga faavauvau.