Ua alia’e i le asō i faatalanoaga ma tusitusiga i le initaneti finagalo faaalia e faatatau i le talaaga o le alii faia’oga a le Penrith Panthers, Ivan Cleary ma le soifua mālōlōina faalemafaufau.
Fai mai le 9News ua auiliili e Cleary i lana faatalanoaga lea lona feagai ai ma le depression poo popolega o le mafaufau.
Fai mai a ia poo le 2019 ina ua toe foi i le Panthers sa ia iloa ai o loo la finau ma le faaletonu lea ma e tele āuga e aofia ai le faigata ona tula’i ese ma le moega i le taeao aemaise le suia o lagona, pe lotovaivai i nisi taimi ae leai se mafuaaga.
Ta’ua e Cleary e taumafai lava e nanā i totonu pei lava foi o nisi tagata ona o le manatu e lē fia tuuina fua se avega i isi.
O le mental health poo le gasegase o le mafaufau o se tasi lea o mafuaaga aupito taatele o faigatā o loo feagai ma le itupa o alii i Ausetalia e pei ona faailoa i le lipoti ma ua saunoa le alii faia’oga e faamoemoe e avea lona faasoa o ona foi faigatā e fesoasoani ai ma una’ia isi o loo aafia foi i lea tulaga ina ia sa’ili fesoasoani ma talanoa i nisi.
Fai mai a ia o loo talanoa tagata uma i le tau o le soifuaga ma afai o oe o loo tausia lou aiga e masani ona iai pea le lu’itau i le tele o le mau mea e ao ona faatino mo le sologa lelei o le aiga.
Fai mai a ia e fesoasoani le talanoa ai ma faasoa e māmā ai le avega.
Puna o Faamatalaga: https://www.nine.com.au/sport/nrl/news-2024-ivan-cleary-mental-health-penrith-panthers-coach-book-reveal-20241015-p5kibe.html
