Ua to’afitu tagata i lo tatou atunuu ua faamaonia nei ua maua i āuga o le faama’i o le tale vivini poo le whooping cough.
O lea aofa’iga ua aofia ai ma le pepe fitu vaiaso na muamua faailoa e le matagaluega o le soifua mālōlōina i le vaiaso na te’a nei, ma ua logoina ai nei e le matagaluega le atunuu e tusa ai o le pipisi o lea faama’i.
I se pepa o faamatalaga mai le soifua mālōlōina ua faailoa ai o popolega ona o le faama’i e pipisi.
E faigofie ona pipisi mai le isi tagata i le isi aemaise i nofoaga tumutumu ma vaapiapi.
E pipisi ma feavea’i e le ea pe a tale, mafatua, tautala aemaise pe a pipii ni siama o le tagata ua aafia i luga o laualuga o meafale ma meafaitino o loo faaaogā.
O āuga poo foliga vaaia o le tale vivini e aofia ai le:
• tale
• tafe ma mamafa le isu
• fiva ma faasolo ina malosi tele le tale
• tale ii ma oo ai ina faigatā ona mānava, faasuati ma pepē pe vaivai le tino.
E soo se tagata e aafia, ae peitai e pito sili ona aafia gofie pepe, alo ma fanau laiti, tinā ma tamaitai ma’itaga faapea ma i latou e iai isi gasegase tumau.
E talosaga atu le mamalu o le atunuu ina ia utagia ma mata’itū lelei āuga ma foliga vaaia e pei ona ta’ua o lenei faama’i.
O i latou o Ioo iai le popolega e vave ona aafia gofie ma tigaina, o alo ma fanau e i lalo ifo o le ono (6) masina le matutua, o tina ma’itaga ma i latou e iai isi aafiaga poo gasegase tumau e pei o le ma’i suka, kanesa ma isi.
O loo galulue le Matagaluega o le Soifua Mālōlōina ina ia mata’itū lenei faama’i ma faamautinoa o loo faamauina ma maua fesoota’iga ma i latou ua faamaonia ua aafia e aofia ai o latou aiga.
O loo faaauau pea puipuiga o le fai o tuipuipui o le fanau o loo agavaa i le tuipuipui o le tale vivini ma o loo faatino i soo se falema’i, faapea ma faalauiloa o loo faatinoina mo puipuiga lautele.
E tatalo atu le Matagaluega ina ia tausisia vaega o loo ta’ua i lalo:
1. ia mautinoa ua atoa puipuiga o le fanau o loo agavaa i le tuipuipui faaauau o le tale vivini o loo faatinoina; o le 6 vaiaso, 10 vaiaso, 14 vaiaso faatasi ma le tui faatulagaina o le 15 masina le matua.
2. ia faaauau ma siitia le tumamā lautele e pei o le fufuluina o lima i taimi uma, fai le talifofoga i nofoaga tumutumu, pe afai foi o tale, pupuni le fofoga pe a tale i se pepa solo mamā.
3. ‘aua ne’i latalata i tagata o Ioo tale po ua iloa ni āuga ma foliga vaaia o le tale vivini.
4. ia nofo i le fale ma mautinoa e tausi ese mai le āuga pe afai ua masalomia pe ua alia’e ni āuga, ina ia taofia le pipisi ai.
Afai o oe poo se tasi o lou aiga o Ioo masalomia pe ua aIia’e ni āuga ma ua tigaina, faamoIemoIe vave vaai se foma’i poo se faIema’i lata ane.
0 le vave ona vaai se foma’i ma togafitia, o le a faaitiitia ai aafiaga o le faama’i.
O le a faaauau ona faailoa atu e le Matagaluega le tulaga o le tale vivini, ma e talosagaina le lagolago a le mamalu o le atunuu e utagia auala o puipuiga ina ia faaitiitia le pipisi o lenei faama’i.
