Ua faamaonia lava o si alii taalo mai Kuiniselani lea ua maliu i totonu o se kalapu i Barcelona ina ua lipotia e faapea na pa’ū ane mai lea nofoaga i se maualuga pe a ma le 10 mita.

O leoleo ua o latou ta’ua i le 7news o Liam Hampson o se tama taalo mai le Redcliffe Dolphins i Kuiniselani, e 24 tausaga le matua na tau sailia a o alu se latou malaga i Spain i le amataga o le vaiaso nei.

O le taeao la analeila na tuuina mai ai se faamaoniga mai leoleo a lea atunuu e moni lava o Hampson le tagata lea na maua lona tino maliu i le kalapu ma o loo ta’ua o se faalavelave tupu faafuasei.

Ua vaaia moomooga alofa ma faamaisega a ana uo ma aiga i luga o upega tafailagi ae o loo ta’ua na malaga Hampson e taamilo i Europa ma ana uo o isi foi tama taaalo lakapi ma sa tau sailia e i latou ia ina ua le vaaia mo le 24 itula ae mulia’i ai faamaonia mai e leoleo o ia lea na maua atu i le kalapu ua maliu.

O loo faia suesuega i lenei mataupu.