O loo malaga i fafo i galuega faavaitaimi le toalua o Mefiposeta Tulua ua 39 tausaga o lona soifua lea ua amata tuli lona faasalaga faafalepuipui e 2 tausaga ma le 6 masina, i moliaga o lona umia o nakoti poo fualaau faasāina e aofia ai le maruana ma le aisa.
E 4 tesimale 3 kalama le mamafa o le pauta o le aisa na maua e leoleo o umia e Mefiposeta o se tama tane o le nuu o Si’uniu i Falealili.
Na maua foi e leoleo i le latou sailiga o umia e lē ua molia le 47 lālā o le laau faasāina o le maruana, 2 sikaleti taai o le maruana, ma le 480 fatu o le laau faasāina.
Na maua foi o ia umia ni paipa e fesoota’i lona faaaogāina i le aisa, ma ni ututau sa ia umia e aunoa ma se pemita faataga mai leoleo.
O le osofaiga a leoleo i le fale o lē ua molia ma faasalaina i le masina o Mati o le tausaga nei na maua uma ai ia nakoti ma ututau ma molia ai loa Mefiposeta.
O le iloiloina o le faai’uga a le faamasinoga na fua i le faatupula’ia o lenei solitulafono i lo tatou atunuu.
O lē ua molia sa galue faamisionare i le atunuu o Filipaina i se vaitaimi, ma sa galue foi i nisi o galuega.
E toalua lana fanau ua faigaluega nei i le latou pisinisi o se fale’aiga.
O lē ua nofosala i le falepuipui sa ioe i ona moliaga, ae o faamaumauga a leoleo ma le faamasinoga o loo faailoa ai sa molia foi i se solitulafono tau nakoti i le tausaga e 2016.
