Ua faailoa mai le faaaopopo o le isi to’alima o tagata mai le malaga mai Brisbane i Ausetalia i le vaiaso nei ua maua i auga o le Koviti19. 

Faamanino mai e le Minisita o Faatoaga ma Faigafaiva Laauli Leuatea Polataivao Schmidt i le polokalame a le Soalepule i luga o le EFKS TV i le Aso Faraile e iai nisi o iuga mai suega poo tests na oo atu ma faamaonia ai ua aafia le isi to’alima.

Ua oo atu nei le aofai o tagata Samoa sa malaga mai i Ausetalia ua aafia i le Koviti i le to’a 15. 

O le taeao nei na feiloai faatopetope ai le Kapeneta e talanoaina le ono tapunia o le atunuu atoa poo se lockdown mo le puipuiga ma o loo tālia e tusitala se feiloaiga ma le afioga i le tamaitai Palemia mo nisi faamatalaga poo le a le tulaga o le a oo ai Samoa.