Ua amata tuli nei le faasalaga 4 tausaga o se tamā na faamaonia ona moliaga e tolu o le faia o se faiga faamalosi i se tina, faaoolima iai, ma lona umia o se aupega matautia.
O lē ua faasalaina o Malili Siafolau o Faleatiu ma o Iulai o le tausaga na tea nei i le po na ia faatino ai ia solitulafono, ina ua agai i le fale o se aiga sa na o le tina e 25 tausaga le matua sa iai ma le tamatama a le tina ua 2 tausaga.
O se taimi poo le 8 i le po na oo ai lē ua faasalaina i le fale, ma ia faatino ai loa ni gaioiga ua faamatalaina e le faamasinoga o ni faiga sa lē tatau ona tupu.
O le tuua o le fale o le aiga e Siafolau na agai ai le tina ma lana tama e saili se fesoasoani, ma e mamao se nofoaga na agai iai ma maua ai le laveai e mafua ona o lea vaega o le nuu e mamao i uta.
O le aiga na tau iai le sailiga a le tina ma lana tamatama 2 tausaga na logoina leoleo i Faleolo ma faailoa iai le mea na tupu.
O le toalua o le tina ma nisi o lona aiga sa agai i se faalavelave o se maliu ae faamuli na o ia i lo latou fale ma lona atalii.
