Ua faamanino mai e le sui o le kamupani vaa o loo fesootai atu i vaa la’upasese poo meli, o loo afea lo tatou atunuu, ia Muaausā Toleafoa Fiona Uili-Talouli le tulaga na iai le vaa na afea Samoa i le taeao o le Aso Sa na mavae nei, ae lei mafai ona taula ona o le galu aau.

O lea foi tulaga ua faamanino mai e le Ofisa Sili o Pulega o Uafu le SPA, ia Soʻoalo Kuresa Soʻoalo, o se tulaga e masani ai taimi nei i uiga loulouā o le tau ae o le saogalemu lava e faamuamua ma o se tasi lea o mafuaaga o loo faagasolo ai se atinae (Enhancing Safety, Security and Sustainability of the Apia Port project) o loo faatupeina e le ADB ma lo tatou Malo o le toe fausiaina lea o le taligalu (breakwater) o loo i le itu i Matu o le uafu i Matautu mo le puipuia ma faaitiitia le aafiaga o galuega o vaa mai le galu aau pe a oso.

Ua ta’ua foi e Soʻoalo e lei faamautuina i le taimi nei tulaga i tau ona o mea ua aafia i le tulaga na tulai mai.

O le vaa na toe foi sa fuafua foi e utu atu iinei le vai e faaaoga ma o se tasi foi lea tupe e maua e Samoa e ala i matagaluega ma auaunaga o loo faatinoina.

E fua le tupe e maua e lo tatou atunuu mai le taula ai o vaa i lo tatou uafu i le telē o se vaa e afea Samoa, ma e oo lava foi i totogi o ovataimi o i latou e galulue i aso ma taimi e taunuu ai vaa nei e totogi uma lava e kamupani vaa.

O le Samoa Global Shipping Services o se kamupani o loo faatinoina lava e tagatanuu o Samoa.