O le asō na faamanatu ai e le Asosi o tagata Saina i Samoa le Aso Faapitoa i le Aganuu a lea atunuu o le Qingming Festival.
Sa auai le Amepasa o Saina i Samoa nei, His Excellency Fei Mingxing ma lona ofisa.
E lē gata i lea o Peresetene o le Asosi o tagatanuu Saina i Samoa le Susuga Bee Leung Wai aemaise ai le Peresetene o le Asosi o Tagata faipisinisi a Saina i lo tatou atunuu Susuga Ji Zhiming.
O lea aso e faapitoa lona tāua i le aganuu a Saina o se taimi e omai faatasi ai aiga e faamamalu ma manatua o latou tupu’aga ua maliliu e ala i le faamamā o tuugamau, faia faiga taulaga ma tū ma aganuu.
O lea aso faapitoa e iloga ai le faaauauina e aiga o tu ma aga na soifua ai tuaa ua mavae.
O le fanuatanu o Saina i Talimatau o le nofoaga e faamamalu iai tagatanuu Saina i Samoa ona o loo lagomau ai tuaa faapea ai i latou na ulua’i taunuu mai le atunuu.
Ae o le faamanatuga o lenei aso ua faamau faailogaina ai foi le soofaatasi o le Asosi o tagatanuu Saina i Samoa ma le Asosi o le ‘aufaipisinisi a Saina lea ua fuafua e sa’ili seleni auā le faaleleia o le fanuatanu i Talimatau.
O lea foi faamoemoe o le a faatalanoa ma i latou o alaala i Talimatau e pei ona tele lo latou sao i le vaavaaia o lenei Fanuatanu.
O le tala’aga o le oo mai ai o tagatanuu o Saina i Samoa nei na amata mai i le Seneturi 19.
O le vaega muamua lava na taunuu mai Samoa o i latou na aga’i mai e fia nonofo sa’oloto i Samoa atoa ai ma i latou sa faatulafonoina le galulue i Samoa nei.
O i latou ia na faaipoipo atu i tamaitai Samoa, sa latou a’oa’oina a tatou tu ma aga ma tutupu a’e o latou aiga i Samoa.
E ui i le lu’itau e aofia ai le faasāina o le taunuu mai o i latou ma lo latou sootaga i tamaitai o lo tatou peitai e lē tau faailoaina lo latou sao tele i le atina’e o Samoa ma lana aganuu faapea lona tamaoaiga.
