Ua faailoa e le Palemia o le atunuu, Jacinda Ardern i tagata e ao ona faamautinoa o loo iai faamaumauga o a latou tusitupe i le IRD poo le Ofisa o Lafoga ina ia aua ne’i misia le peimeni e fesoasoani ai mo le tau o le soifuaga, le cost of living payment.
E silia ma le 2.1 miliona tagata Niu Sila o le a mauaina le ta’i 350 tālā Niu Sila o le peimeni lea pe a oo i le Aso Gafua. O i latou e agavaa o soo se tasi e na te maua le totogi o le 700 pe itiiti ifo ma e lē o agavaa i le Winter Energy Payment ma e 18 tausaga ma sili atu.
O le tulaga e pei ona alia’e e lē o iai tusitupe a le silia ma le 164 afe o tagata Niu Sila e agavaa i le IRD lea e feagai ma le faasoaina o lea peimeni, o le ala lea o le faailoa e le Palemia i tagata e ao ona faamautnoa ua iai o latou faamaumauga i le Ofisa o Lafoga a o le’i oo i le aso e faatino ai lea fuafuaga.
Na ta’ua foi i le lipoti a le Newshub e 300 contractors ua faafaigaluega e le malo i le faagaioia o le scheme lea ma e faaalu ai le 14 miliona, e pei ona saunoa ai le ta’ita’i o le ACT, David Seymour.
O le aso 31 o Mati 2024 e tatau ona oo atu iai ua update pe faailoa faamaumauga o tusitupe i le IRD ina ia maua ai lea peimeni.
Toe sau ai ma le faamanatu i le lipoti lea ina ia silafia e tagata e lē vili atu le IRD ina ia sailia mai ou faamaumauga, e ao ona mataala i le tulaga lea ina ne’i faaaogā foi e le au taufaavalea e su’e ai sa latou polofiti mai lea foi fesoasoani ua ofoina.
