O le taeao analeila na faatino ai se sauniga a le ekalesia Metotisi i le afioaga o Nuusuatia e faamanatu ai le atoaga o le 115 tausaga talu ona faavae le Ekalesia Metotisi i ona laueleele.

 O le Ekalesia Metotisi o le uluai tapuaiga lea sa faavaeina i totonu o le afioaga.

O le Susuga i le Peresitene o le Ekalesia Metotisi, Faulalo Leti Paaga na taitaiina lenei sauniga aemaise ai o le tatalaina aloaia o le galuega o le maa faamanatu o lenei faamoemoe.

“O lenei faamoemoe e manatua ai tuaa ma mātua sa galulue punouai ma le lē faalogologotiga ona o le feau o le talalelei mo oe ma au, ae o le fesili la, o le ā sau mea e fai oe ma a’u lea o loo soifua mai i le taimi lenei?

“Fai sou sao auā lau Ekalesia, atunuu, nuu ma le aiga auā e tautala aso e pei o galuega a o tatou tuaa ae faato’ā aoga ma matagofie ma lelei galuega a o tatou tuaa ona o oe ma a’u.

“Ou te iloa e leai se mea e te le mafai ona fai, e mafai mea uma ona o Iesu lea, faatuatua iai lototele tatou te malolosi uma ai ona o ia ma lana feau.”

E pei ona tuuina mai i faamatalaga, o le tausaga e 1908 na faavaeina ai le ekalesia ma faamaopoopoina e le sui o le afioaga ia Te’o Lauifata ma o le uluai tausi Matagaluega o le uluai lotu foi lenei i le afioaga o le Susuga i le Faafeagaiga ia Luteru.  

A o lei faavaeina le Ekalesia Metotisi i totonu o le afioaga, e agai lava e tapuai tausavali i Lotofaga ma Fusi i Safata.

O le fale afolau sa amatalia ai le Ekelasia seia oo i le tausag e 1950 sa uluai umusaina ai lona Malumalu a o iai le Tausi Matagaluega ia Kalepo Afemata ona toe siitia mai ai lea i le isi ona tulaga i le aai tuai lava.

Ina ua oo mai galuega o ala tetele a le malo na siitia mai ai le Ekalesia i lona tulaga i le fanua o le afioaga ia Lauifata ma toe auina ai loa i le tulaga o loo iai nei i le tausaga e 1988 e le Tausi Matagaluega o Lokame Malaesilia.

O luga o le maa faamanatu a le ekalesia o loo faamauina ai faafeagaiga e 23 mai lava i le tausaga na faavaeina ai seia oo mai i lē o loo tausia le galuega i le taimi nei le Susuga i le Tausi Matagaluega o Faamanatu Tavita ma lona faletua faapea ai ma le loaloa o le ekalesia o loo galulue ai.

O le tau aofai o le fausiaina o lenei maa faamanatu faatasi ai ma nisi galuega faaleleia a le Ekalesia e $50,000 faatasi ai ma le sailiga seleni sa tagi i lima ai tamafanau a le Ekalesia i atunuu mamao ma Samoa nei mo le faamoemoe i le asō i lona aofaiga e $80,000.