Ua amanaia e le Malo le sao tāua o le faalapotopotoga tuma’oti mo faasao o Samoa poo le Samoa Conservation Society, ua faamanatu le sefulu tausaga talu ona faatuina ma lagolago i taumafaiga a le Malo e ala i le matagaluega o puna’oa faalenatura ma siosiomaga.
Ua faaalia e le Minisita o lea matagaluega a le Malo le afioga Toeolesulusulu Cedric Schuster i le faamanatuina o le 10 tausaga o le sosaiete, ua tele taumafaiga lelei a lea faalapotopotoga tuma’oti i lo tatou atunuu ua mafai ai ona fesoasoani i taumafaiga a le Malo e faatumau nisi o alaga’oa faalenatura e fesootai ma atina’e o le puipuia ma faasao o le meaola o le natura faapea ma laau.
Faaalia e le Minisita i lana saunoaga i le sauniga na faamanatu ai le sefulu tausaga o le sosaiete, e lei faigofie le galuega sa feagai ma le sosaiete i ia tausaga e tele ona sa a’e vanu ma ifo mauga e le gata i le laueleele ae o le gataifale, ma o se ata manino lea i le Malo o le lagolago o le sosaiete e faasao i’a ma figota o le sami, ma le laueeleele.
