Ua 49 tausaga talu ona osia sootaga faavaomalo o Samoa ma le atunuu o Saina, ae o le tausaga nei ua atoa ai le 75 tausaga talu ona faatūina le Malo o tagata Saina e pei ona faamanatu i lo tatou atunuu i se sauniga na faia i le maota o le Amepasa o lea Malo i Samoa.

O le tamaitai Minisita o Faamasinoga sa avea ma sui o le Palemia e momoli se saunoaga faafetai ma faamanuia ai foi i le aso fanau o lea malo.

I lana saunoaga na faailoa e le sui Palemia le afioga Matamua Vasati Sili Pulufana le faaauau pea o sootaga faavaomalo ma lea atunuu, e pei ona faaauau ai pea fesoasoani a le malo o Saina mo le atina’e o le tamaoaiga o le malo o Samoa.

O avanoa sikolasipi, o loo a’ooga ai alo ma fanau o le atunuu i Iunivesite i Saina, o fesoasoani i le itu i a’oa’oga ma le soifua mālōlōina tainane le faaleleia o atina’e tau faatoaga i Samoa o nisi ia o vaega o loo lagolago mai ai lea malo.

O le faamanatuina o le 75 tausaga o le malo o tagata Saina sa auai le afioga i le Ao o le Malo, o minisita o le Kapeneta ma faipule o le Palemene, aemaise o sui o isi malo o loo galulue i lo tatou atunuu.