O tuuaiga a se tasi o tagata faigaluega togiaso o le Pulega o Tagata Tafafao mai Fafo o le lafo e lē sa avea ma Ofisa Sili o lea auaunaga a le Malo, o ni upu faalumaluma ia te ia, ua le mafai e leoleo sa finauina le moliaga ona faamaonia, ma ua faamamā ai le suafa o lē na tuuaia, le susuga Faamatuainu Lenata’i Su’ifua Faamatuainu.
E fitu molimau a leoleo sa tutulai i le faamasinoga fesoasoani e faia a latou mau tuu fofoga e lagolago ai le moliaga, peitai o le faaiuga a le afioga i le Faamasino Fesoasoani o se tasi o sui peresetene o le Faamasinoga o Fanua ma Suafa le afioga Luamanuvae Palesoo, ua taunuu ai i le faaiuga e soloia ma faaleaoga le moliaga a leoleo ona ua le mafai ona latou faamaonia.
O le moliaga o lē na tuuaia na mafua mai i se galuega i se fanua i Palisi sa faatino e nisi o le aufaigaluega a le pulega o tagata tafafao.
Se faatalanoaga ma le susuga Faamatuainu Lenata’i Su’ifua Faamatuainu, o lē sa avea ma Ofisa Sili o le Pulega o Tagata Tafafao mai Fafo, ua faamamāina lona suafa mai le moliaga o le faia o upu taufaifai ma faalumaluma.
