E $2,000 tālā le faasalaga o pasese poo tagata malaga uma e ulufale mai i Samoa, ae lē usitai i aiaiga faalesoifua maloloina mo le faanofoesea i o latou aiga mo le fitu o aso.

O pasese uma na taunuu mai le malaga mai Fiti faapea le malaga mai Niu Sila i le Aso Toonai ma le Aso Sa na te’a nei, ua amata ai le aiaiga fou o le faanofoesea i le aiga mo le fitu aso, pe afai ae fai le suega i le taunuu lea i le malaevaalele faapea le uafu i Apia, e lē o aafia i le siama o le faama’i Koviti-19.

E lei faailoaina se lipoti lata mai, e iloa ai le aofaiga o pasese na ulufale mai i lo tatou atunuu i le faaiuga o le vaiaso. O lea foi lipoti pe a oo ina faalautele mai e le Soifua Maloloina, o le a iloa ai pe iai nisi na aafia i le siama ina ua taunuu, pe sa saogalemu uma e leai se isi o aafia.

I le pepa o faamatalaga faalauaitele mai le Sui Faatonusili o le Soifua Maloloina, le susuga i le alii foma’i, ia Dr Glenn Fatupaito, ua ia fautuaina ai lo tatou atunuu e na o le toatasi le tagata e malaga i le malaevaalele e aumai se pasese poo ni pasese na malaga mai. O lea faiga e tuuitiitia ai le avanoa e pesia ai i le faama’i.

Ua faailoa foi e le Sui Faatonusili, o i latou e faanofoesea i aiga, e fai le su’ega i le mae’a o le 3 aso ma e faatino lea e le auaunaga a le Soifua Maloloina. E faapena foi le isi su’ega pe a atoa le 7 o aso. E lē o taliaina le faia e le tagata o lana lava su’ega poo le test, ina ia mautinoa e lē saofia ai se isi auala e ono masalomia ai, le sa’o atoatoa o le taunuuga o se su’ega.

O lona uiga o tausi soifua ma foma’i e faia le su’ega a o faanofoesea i le aiga, e faaaogā ai se falema’i e latalata ane i le nuu, o loo faanofoesea ai se tagata malaga.