Tusia : Maina Vai

Ua faamālōlō lē tumau le Sui Ofisa Sili o Pulega o le Vaega o Tupe o le Matagaluega o le Soifua Maloloina ia Agnes Stowers seia faia le suesuega a le Komisi o Tagata Faigaluega a le Malo (PSC) i tuuaiga faasaga ia te ia.

O lea faaiuga na faia lea e le Kapeneta i le Aso Faraile na mavae nei, ina ua oo atu se tuualalo mai le PSC. Na faaalia e le Taitaifono o le PSC Lauano Vaosa Epa, ina ua fesiligia e tusitala e faapea ua manatu i lea tulaga ina ia malupuipuia le suesuega o loo feagai nei ma le PSC.

O tuuaiga na faatula’i mai lea faasaga atu i le ACEO, ina ua maua ai e le suetusi faalotoifale o le matagaluega le tulaga le talafeagai na faamatu’u atu ai konekarate i se kamupani e pulea lea e le tama o le toalua o le ACEO, lea sa avea ma Minisita o le Kapeneta o le faigamalo talu ai. E aofia ai i lea tulaga le auai ai o le Sui Ofisa Sili i taumafaiga e totogi atu tupe mai le Matagaluega o Tupe agai i le konekarate.

I lea lava ripoti a le Suetusi ua faailoa ai le augapiu ma se taumafaiga a le ACEO e faailoa atu lona sootaga i le konekarate ma ana taumafaiga e faasese pepa ina ia maua le totogi mo lea konekarate. Ua faaalia e Lauano sa amatalia lea su’esu’ega i le aso 21 o le masina ua tuana’i, i se talosaga na tuuina atu e le Matagaluega o le Soifua Maloloina.