Ua faaopoopo atu e motu o le Pasefika lo latou leo i le lagolagoina o le vaega i le Fonotaga a Rotterdam e faaaogā se suiga o le a lisiina ai vailaau oona ma faamalosia ai feagaiga faavaomalo ua fuafuaina e faafaigofie ai le faia o faaiuga e atunuu, e tusa ai ma fefaataua’iga i vailaau oona.
O lenei fonotaga o loo faagasolo nei i Geneva ma o loo auai atu ai le Pule Sili Lagolago a le Matagaluega o le Siosiomaga, Afioga Seumalo Afele Faiilagi.
I le lipoti mai le ofisa a le Polokalame o le Siosiomaga a le Pasefika poo le SPREP, na saunoa ai Seumalo i lenei fonotaga.
“E toaititi lava se vaega o loo polokaina pea le lisi o vailaau na maua e le Komiti o Iloiloga o Vailaau e ausia ai tuutuuga a le Fonotaga mo le lisiina atu ina ia faatumauina pea le manulauti o lenei faamoemoe.”
“E pei ona iai le Vaega II o le tulafono e faapea e mafai lava ona lisiina ma faatau atu vailaau pe afai e muai faailoa le maliega, o lena faatinoga matou te tautino atu o se gaioiga e le ogatusa ma le mataupu faavae o le fonotaga.”
“O matou atunuu e faalagolago le tamaoaiga i oloa e auina mai i fafo, o le ala foi lea matou te faalagolago ai ia i latou o loo gaosia ma sapalaiina nei vailaau ina ia faailoa atu faamatalaga uma ina ia mafai ona faia faaiuga tatau i lenei mataupu.”
O se fonotaga tāua tele lea mo sui usufono a le Pasefika e faaleoina ai lenei mataupu ona e iai le talitonuga ua tele taimi e sasi ai lenei fonotaga i le tuuina ai o nei vailaau i faamaumauga e ui e iai fautuaga mo le lisiina o vailaau mai le vaega faasaienisi.
O le Vaega III o lenei faamaumauga o le ki lea o le faatinoina o lenei vaega ona o loo lisiina ai vailaau oona ua taofia le faaaogāina ona o le tulaga i le soifua maloloina lautele o tagata poo le puipuiga o le siosiomaga.
Ma o lenei sasi na faailoa ai e Seumalo e ao lava ona folasia i luma o le fonotaga.
“E ui ina laititi lava le vaega o gaosia ai vailaau i le Pasefika, ae o loo faapea ona maualuga ai le tulaga o le vaaia lelei o nisi o vailaau i nisi o vaega.”
“O loo mataituina e o matou taitai le aafiaga tele o nei vailaau i o matou atunuu ma o matou siosiomaga mo le puipuiga o le Pasefika e ao ona malilie ia faasaoloto le Pasefika mai le faaaogāina mai nisi vailaau.”
E silia ma le 2000 sui usufono e aofia ai ma sui mai le Pasefika o loo auai i lenei fonotaga mo le lua vaiaso.
