Faaalia e le ta’ita’ifono o le komisi su’esu’e le tofa Tuu’u Ieti Taule’alo, e tele ma anoanoa’i vaega e ao ona feliuliua’i iai se finagalo o sui o le komisi ma e tāua ai tele le tuu avanoa i le atunuu e faaleo atu ni atugaluga, ma ni faitioga ma faailoa atu foi poo ā ni faaletonu sa molimauina i palota tetele ua mavae aemaise le faiga filifiliga a le atunuu na faato’ā mae’a atu ia Aperila o le tausaga na te’a nei.
E ese mai i mataupu na laga i le feiloaiga a sui o le komisi su’esu’e ma le afioaga o Vailele, o le palota mai fafo o le mamalu o tagatānuu o Samoa o se tasi lea o vaega o mataupu o loo tatala ai le avanoa e faaali iai ni lagona. Ae sa fesiligia ai foi se finagalo o le ta’ita’ifono.
Le ta’ita’ifono o le Komisi su’esu’e o faigapalota le tofa Tuu’u Ieti Taule’alo. Ua faailoa i le sailiiliga mo afioaga ma nuu o le Vaimauga Muamua e aofia ai Laulii, Letogo, Maugafiafia, o Fagalii sa faia i le hall a le ekalesia katoliko i le afioaga o Vailele e ta’i lua vaiaso o le galuega i Upolu ma see i le motu o Savaii seia oo ina mae’a.
O le itumalo o le Vaimauga Numera 2 ua oo iai le galuega lea o loo aofia ai nuu ma afioaga o Moataa, Vaiala, Vaipuna, Levili, o Vaivase tai ma Vaivase uta ma Toomatagi. O le hall a le ekalesia EFKS i Moataa o le a faamautu ai le galuega a le komisi su’esu’e mo lea itumalo faapalota.
O le masina o Novema o loo faatulaga e tatau ona tuuina atu ai se lipoti a le komisi su’esu’e o faigapalota i le Palemene.
O le Tulafono o Faigapalota a le atunuu ua iai le talitonuga o se tasi o sui o le komisi su’esu’e o faigapalota lea ua amatalia le latou sailiiliga, ua tele taimi ma tausaga o faia iai teuteuga, e mafua mai lava i gaioiga ma mea na tutupu i faiga filifiliga a le atunuu i le sailia o sui usufono o itumalo i faalagamaea o upufai o le Malo e ala i tofi faipule o le Palemene.
O le afioaga o Vailele i le itumalo o le Vaimauga Numera muamua na afea muamua i le su’esu’ega a le komisi i le Aso Gafua o lenei vaiaso, ma e lē to’atele nisi na auai ae sa molimauina foi e fulisia i le itupa o matai alii ma sina vaega to’aititi o tina ma tamaitai ae e leai nisi o le tupulaga ua aulia le 21 tausaga na auai auā o le avanoa lea e faaleo ai ni o latou lagona e fesoasoani i le sailiiliga a le komisi.
E iai foi le talitonuga o le uluai taimi lenei ua savalia ai e se komisi su’esu’e o faigapalota nuu ma itumalo i se taumafaiga ia maua le avanoa o tagata uma e faaleo ai lagona i ni auala e faaleleia atili ai faigapalota a le atunuu, ma alofia ai le toe tulai mai o feeseesea’iga ona o le palota ma iu lava i le tulafono ni finauga.
