O le fono a le Kapeneta i le Aso Lulu o lenei vaiaso o le a folasia ai e le minisita o tupe o loo iai ma le vaaia o le matāgaluega o faalapotopotoga tuma’oti a le malo, suafa o i latou ua filifilia mo avanoa o sui o Komiti Faatonu mo nisi o faalapotopotoga tuma’oti a le malo.
O avanoa ia e aofia ai ma sui o Komiti Faatonu a nisi faalapotopotoga tuma’oti a le malo na filifilia i le taimi o le malo tausi le caretaker government a o lumana’i le palota tele ia Aokuso o le tausaga ua mavae.
Ua faailoa e le Minisita o Tupe le afioga Mulipola Anarosa Ale Molioo i auala o fesoota’iga a le ofisa sooupu a le malo, na ulufale atu le faigāmalo e iai faai’uga a le Kapeneta tausi na filifilia ai nisi o sui o Komiti Faatonu ae lē talafeagai.
O le māfua’aga lea na faalēaogā ai ia filifiliga ae toe faasalalau avanoa.
O le finagalo foi o le tama’ita’i Minisita o Tupe i lea faasalalauga a le ofisa sooupu a le malo na ia faailoa ai, o le masina fou e amata ai ona faagaioi lesitala o tupe a tagatānuu o Samoa o alala i atunuu i fafo mo latou sea i le kamupani vaalele o le Samoa Airways.
O luga o upega tafa’ilagi o le a faagasolo ai le lesitala e faatino e le ofisa o mavaega tausi, le UTOS.
Ua iai foi le fuafuaga e malaga sui o lea faalapotopotoga a le malo e feiloa’i ma le atunuu o alala i atunuu i fafo e faatalatalanoa atili ai le tuuina atu o a latou sea mo le kamupani vaalele a Samoa e pei ona fuafuaina le aumaia o ni vaalele tetele se lua mo le toe faia o malaga mai Samoa aga’i atu i Niu Sila, Ausetalia ma Amerika.
