Ua aloaia nei le taamilosaga lakapi liki a le Pasefika ua lagolago malosi e le Malo o Ausetalia e pei ona faalauiloa e le komisi o le liki le taamilosaga faatasi ai ma le Palemia o lea Malo ma le Minisita o atunuu Pasefika a le Malo o Ausetalia.
E 6 ‘au a alii ae fitu au a tamaitai o le a tausinio i le taamilosaga o le auai atunuu e pei o Ausetalia, Niu Sila, Samoa, Tonga, Fiti, Papua Niu Kini, ma le Atu Kuki.
O le taamilosaga lenei o le siamupini o le Pasefika le Pacific Championship o le a amata i le aso 14 o Oketopa ma le faamoemoe o le sailiga siamupini i le vaega o ‘au a alii o le a faia i le aso 4 ma le aso 5 o Novema.
E lua taaloga e faia i Ausetalia ma le lua i Niu Sila ae fā taaloga o le a faia i Papua Niu Kini.
O le taamilosaga lenei ua saili ai se faiaoga o le Toa Samoa auā ana tapenaga ina ua faamavae le faiaogaulu o Matt Parish.
