O le aoauli analeila lea na faalauiloa aloaia ai e le Manu Samoa XV lana ‘au lea o le a masii atu mo le Ipu o le Lalolagi i Pale i Farani.
E 32 i latou lea ua filifilia e pei ona faailoa e le Taitaifono a le Iuni Lakapi a Samoa, Tuilaepa Sailele Malielegaoi ma le toatasi o lea faailoa mai i se taimi mulimuli.
Ina ua mae’a le lauina o le ‘au na faamanatu ai e le Taitaifono ia i latou ua filifilia e tauaveina le tagavai a le atunuu.
“E le faigofie lou tu i o i le mea o le a faia ai taaloga ma e tilotilo i le fu’a lea o le a lealea mai, its not an easy opportunity to play for that flag ma tatou te faaigoaina o le tagavai o le saolotoga.
“Ia outou manatua le fu’a lea tou te taaalo ai e le o se fu’a na te’i ua tatou maua, na tatou maua ona o le toto masaa o le atunuu.
“O le matou toe tala ia manuia o outou faiva.”
Na faailoa e le Faiaoga a le Manu Samoa, Vaovasamanaia Seilala Mapusua e lei faigofie le filiina o le ‘au.
“E tele lava se taimi sa feagai ma le filifiliina o se ‘au lelei mo le faamoemoe ma o le filifiliina sa fua mai lea i le malosi ma tulaga o tama o loo iai.
“A o agai atu ai mo le Ipu o le Lalolagi o loo malamalama i le tofiga ua tuuina mai ia te i matou i le avea ai ma avefu’a a le atunuu, o lona uiga o loo matou tauaveina le atunuu atoa i lenei faagatama o le auala e taunuu manuia ai lenei faamoemoe o le folau faatasi.”
Na faaalia ai foi ma le tulaga o iai nisi o sui o le au e aofia ai Ben Lam ma Lima Sopoaga lea e lei mafai ona taaalo i taaloga sa faia i le atunuu ona o ni mafuaaga tatau.
“O loo faia lava fesootaiga masani ma i laua nei ae iai le talitonuga o le a auai mai i laua i se taimi o i luma.”
O Michael Alaalatoa ma Chris Vui o i laua ia o loo filifilia nei ma Kapeteni Lagolago na faailoa ai foi lo laua agaga faafetai ona o tofiga ua tuuina ia i laua.
“O le tuuina mai o nei tofiga ia i ma’ua o le a ma galulue faatasi ai i le tauaveina ma le agaga lotonuu ma o le a taumafai foi ina ia iai se ‘ai i tapenaga ma faamoemoega mo taaloga o le a alo atu iai.”
O le aso 11 o le masina nei lea o le a faimalaga atu ai le ‘au a le atunuu i Farani mo ana tapenaga.
