O le afiafi nei lea na faalauiloaina aloaia ai e le Afioga i le Palemia, Fiame Naomi Mataafa le $60 tupe pepa, o se tupe pepa faaopopo lea i tupe pepa o loo faaaogaina i le atunuu.

O lenei faamoemoe sa faataunuuina lea i le faletalimalo o le Taumeasina.

I le tatala aloaia ai o lenei tupe pepa, na saunoa ai le Minisita o Tupe, Afioga Mulipola Anarosa Ale Molioo e tusa ai o le auga o lenei faamoemoe.

“Le Paia maualuga ua aofaga potopoto mai e molimauina le faalauiloaina aloaia o le $60 tupe pepa fou, e faamanatu ai le atoaga o le 60 tausaga o le Malo Tutoatasi o Samoa.

“O lenei tupe pepa ua faailogaina e le gata o se matati’a tāua mo le faletupe tutotonu o Samoa le atina’eina o tupe a le atunuu ae mo le atunuu atoa foi.

“O le uluai taimi lenei i le talafaasolopito o tupe pepa a Samoa, o le a tuuina atu ai le $60 mo le faatamilosaga o tupe ma faaaoga i totonu o le atunuu.

“O se faiga tumati’e e faamae’a ai le faamanatuina o le 60 tausaga o le Malo saoloto o Samoa.”

O lenei tupe pepa o loo atagia ai le faailogaina o se taeao fou e pei ona ta’ua e le Minisita.

“O le amataga o se aso fou ma o se faailoga o se faamoemoe ola ma le faafouina a o tatou faamanatuina se suiga tāua i le talafaasolopito o Samoa.

“O le tamaitai Palemia muamua o Samoa ua filifilia e fausia se moemoe fou mo tagatanuu o Samoa.”

Na ia faamatalaina ai ata o loo i luga o lenei tupe pepa.

“O lenei tupe pepa fou o loo iai le ata o le Palemia, Afioga Fiame o le tamaitai Palemia muamua i Samoa, talu mai le 60 tausaga o avea Samoa ma Malo Tutoatasi.

“O le isi itu o le tupe, o loo iai le ata o le Palemia muamua o Samoa le Afioga Fiame Mataafa Faumuina Mlinuu II, a o ia tauaaoifoina i lalo le tagavai o le Malo o Niu Sila i le tatou uluai Tutoatasi.

“O le isi foi tulaga maoa’e i le tupe lenei ona o ata o le tamā ma lona alo tamaitai o i laua uma ua tofia  i le ofisa o le Palemia i totonu o le 60 tausaga talu ona tutoatasi Samoa.”

O lenei tupe pepa o loo iai ni suiga faatekonolosi e faamalosia ai le puipuiga o tupe mai lomiga faasolitulafono.

“O loo iai se filo faamalama lanu moana ma le lanu meamata e faigata ai ona lolomi faasolitulafono.

“Faailoga o le puipuiga o loo faaaoga ai le mamanu o le fugalaau a le atunuu le teuila.”

Na faailoa foi e le Kovana a le Faletupe Tutotonu a Samoa, Maiava Atalina Emma Ainuu-Enari, o le tau aofai o le faatupeina o le lolomiga o lenei tupe pepa e silia lea ma le 2miliona mo le lolomiina o le 1 miliona o lenei tupe pepa fou.

O lenei tupe pepa fou na faaalia e Mulipola o le a tuuina atu i le atunuu e auala atu i faletupe o fefaatauaiga i le Aso Lulu o le vaiaso fou.