A’o faaauau pea galuega a le Matagaluega o le Soifua Maloloina, o le fautua ma tima’i ma fana foi nofoaga o loo nonofo ai namu i nuu o loo pito toatele tagata ua maua i le gasegase o le fiva o ponaivi, o lea ua faailoa i faamaumauga lata mai o le pipisi o le dengue fever poo le fiva o ponaivi, ua tau faaitiitia le numera o tagata ua maua i le faamai.
E toa 62 tagata na faamauina ua maua i le va o le aso 6 ma le 12 o Me, ae o le ripoti lata mai, e 18 gasegase na faamauina i le va o le aso 13 i le aso 19 o le masina nei lava. I le tuuaofa’iga atoa o tagata ua aafia, sa tasi le afe selau tolu sefulu lua (1,132) tagata na faamauina le aafia i le fiva o ponaivi mai le va o le aso 6 i le aso 12 o Me, ae o lea ua pau ifo le aofaiga atoa i le 991 i faamaumauga o le aso 13 i le aso 19 o Me. E lei toe maua se feiloaiga a tusitala ma le pulega o le matagaluega o le soifua maloloina talu mai le aso 19 o Aperila na faailoa ai e le Faatonu sili o le Matagaluega o le Soifua Maloloina le pepesi o le faamai o le fiva o ponaivi.
