Tusia : Maina Vai

Na taua e le sa avea ma loia sili i le Faamasinoga i le aso o le faaiuga a le Fofoga fetalai e faailogalanu, ma ua taofia ai le aia tatau a sui tamaitai nei e saofafai ai i le Palemene

E le gata i lea na ia taua fo’i e le faatulafonoina ma le faavaea le musua pea o le Fofoga Fetalai e faatauto i laua. O loo saili atu Aliimalemanu Alofa Tuuau faapea ai Faagasealii Sapoa Feagia’i ise poloaiga ( cohesive order) e mafai ona tuuina atu e le Faamasinoga i le Fofoga Fetalai e faatauto ai i laua.

O finauga a Aumua o loo faapea atu pe faamata e iai ni faavae faaletulafono mai le Fofoga o le Fono na te te’ena ai Sui Tamaitai nei e toalua. Sa faailoa foi e leai ni faavae o le talosaga tetee a le Fofoga fetalai e ui o lea sa ave iai le avanoa e toe teuteu ai lana faasilasilaga poo lana talosaga tetee.

E  fa’i o le  le teuteua o le faasilasilaga lea ae ua tilotilo le loia o loo tulai mo le Fofoga Fetalai i le mataupu lenei ma tuuina atu ai e moni le faaiuga a le Fofoga Fetalai ua fai, peita’i e le’i talosaga le Fofoga Fetalai o se vaega o lenei mataupu ma e leai la se faavae poo se finauga mai ia te ia e mafai ai ona ia teena le talosaga a le itu tagi. 

 O le isi itu sa finau ai le itu tagi pe faamata e le faatulafonoina le faaiuga na le faatautoina ai sui tamaitai e toalua. Ona o lea ua maea le faaiuga a le Faamasinoga o Apili i le 10% o Tamaita’i i le Palemene, lea o loo faapea mai ai e tatau ona 6 tamaitai i le Palemene. 

O le taimi nei e na’o le toafa tamaitai o loo seei i le Palemene o Samoa. O le finauga lona tolu a le itu tagi o loo faapea mai ai pe faamata e talafeagai ona tuuina atu se poloaiga (cohesive order) i le itu tali (itu a le Fofoga Fetalai), i le talitonuga o le itu tagi e aafia loa le aia tatau a le tagata e iai i le Faamasinoga le malosiaga e faasalavei atu ai ma tuuina atu le poloaiga lea.

O loo finau lava le itu tali o le le mautonu o tulaga na tutupu mai, fua i le vaega 44 o le Faavae le ala lea o le faia o le faaiuga a le Fofoga Fetalai, ua talafeagai ai ona faia se faaiuga a le Faamasinoga a’o lei iai se faaiuga a le Fofoga fetalai sei tau faamanino tulaga ia.

Sa faapea mai le Faamasino Sinia ia Vui Clarence Nelson o loo manino le vaega 44 o le faavae o tamaitai lava e sili a latou palota i le maea ai o faigapalota e mafai ona faatautoina ma Sui Faipule.

Sa finauina foi e Aumua o loo iai le mautinoa i le vaega 44 o le tulafono, o le mautinoa foi lea i le vaega lea o le tulafono na tuuina mai ai le poloaiga e le Ao Mamalu o le Malo, peitai o loo teena Fofoga Fetalai.

“Na pau le tulaga o le le mautonu o le taimi ua maea le palota ma o loo talia tagi o se faigapalota i auala na soli ai le tulafono. O lea ua maea le palota laitiiti na o fa tagi, o na tagi na le le lua na faaauauina ae na toe ave i tua”

O loo faapea mai le tamaita’i loia a le itu tali ia Leilani Tamati e leai se tulaga o finauina ai e le Fofoga Fetalai le vaega 44 o le faavae seia vagana ai le Afioga To’omata Norah o ia lea o loo ia fesiligia le faauigina o lea vaega. E ui i lea tulaga sa faapea mai Vui o le tagai lava lea a Toomata ia, peitai o loo iai le tulaga o le itu tali i le mataupu e ala lea i lona teena o le faatautoina o sui tamaitai.

Sa teena foi e le itu tagi le faaupuga na tuuina atu e le tamaitai loia o le itu tali i le faamasinoaga e faapea, o le isi tulaga lea o le finauga a le Fofoga Fetalai ia taofiofi ai le soona toatele o sui tamaitai i le Maota.

Sa faapea mai Aumua…O lea faatoa maea atu le aso faamanatu o tina ma tamaitai o le lalolagi e le talafeagai ai ia lafoga faailoga tagata faapea. Sa toe faamaualalo le tamaitai loia i le Faamasinoga ina toe faafoi mai lana upu, o ia na te lagolagoina le sao taua o tamaitai.