O le aso ananafi se tasi o aso faailogaina i Melepone ma Ausetalia atoa foi ona o tuuga solofanua ua masani ai le toatele i tausaga taitasi, le Melbourne Cup e pei ona lausilafia ai.
O se lipoti a le alaata 7 a Ausetalia ua lipotia ai le sasaaina e nisi poo se tasi foi o le tusa ma le afe o lita o le suauu i luga o le malae o loo faia ai le tuuga i Flemington.
Fai mai na faavave ai le Racing Victoria e faaleleia lea tulaga ma lipea le malae tutuu ina ua maitauina lea faaletonu.
Feta’ua’ina i nisi lipoti o le tagata na ia faatino lea tulaga o se tagata e iai lona faafitauli tau taaloga faitupe ma ua ta’ua o le faalia lea o lona tetee i le tuuga. Fai mai ua suesue nei e leoleo le mataupu.
Ae i le tuuga lava ia ua lipotia o le taimi muamua lenei ua mafai ai ona toe foi le toatele e faatasitasi i nofoaga faapea mo le talitalia o le tuuga lea e aofia ai solofanua e le gata mai Ausetalia ae faapea foi mai Niu Sila e tauofo ai tagata ma manumalo ai i ni faailoga tupe tetele e fua i le tele o le tauofo a le tagata.
