E toalua isi tagata maliliu ua mautinoa mai le mu i Ueligitone o lea ua faailoa mai e leoleo o laua suafa.
O i laua nei o Kenneth Barnard e 67 tausaga, ma Liam James Hockings e 50 tausaga.
Ua toalima iai tagata ua mautinoa ma o le toalima foi lea ua mae’a ona aveesea mai e leoleo o latou tino maliliu mai le Loafers Lodge hostel lea na mu i le vaveao o le Aso Lua o le vaiaso talu ai.
E ui ua mautinoa mai le toalima ua maua o latou tino maliliu, ae le o mafai ona mautinoa se fuainumera atoa o tagata ua ma’umau ai soifua e tusa ma lipoti mai le ofisa o leoleo ona o loo faaauau pea suesuega.
