Ua manumalo le Manu Samoa i lana taaloga ma le Barbarians i le faaiuga o le vaiaso na tea nei i ‘ai e 28 i le 14, ma ua toe sauni ai i le isi ana taaloga o le a feiloai ai ma le ‘au malosi a Aialani, a o lumanai le taamilosaga o le Ipu o le Lalolagi i le masina fou o Setema.
O le taaloga lea ma Aialani ua faatulaga mo le aso 27 o Aokuso le faaiuga o le vaiaso nei.
Ae i taaloga lakapi lava o lea ua faailoa lautele mai le taaloga a le tatou aulakapi a tamaitai le Manu Sina o le a feiloai ai ma le ‘au malosi a tamaitai Niu Sila le Black Ferns i le masina fou o Setema i le aso 23.
O le taaloga o le a faia i Pukekohe ma o le a faasalalau sa’o e le Sky TV Sports e pei ona faailoa ai i se pepa o faamatalaga faalauaitele.
Ua faailoa e le faiaoga o le Manu Sina le agaga faafetai i le Iuni Lakapi a Niu Sila i le avanoa ua maua e taalo ai le Manu Sina ma le aulakapi a tamaitai Niu Sila ona o avanoa lelei e saga unaia ai le taleni ma le tomai o tamaitai Samoa i le faatinoina o le lakapi.
Ua faailoa foi e le faauluuluga o le High Performance a le Lakapi Samoa le tofa Seumanu Douglas Ngau Chun, sa tulimatai ni avanoa faapea i le lumanai mo le atina’e pea o tamaitai Samoa i le lakapi, ae peitai o lea ua maua se avanoa tāua e taaalo ai ma le Black Ferns a Niu Sila.
