O popolega ma atugaluga i le mama i fafo o ni suāuu mai le vaa su’esu’e o le fitafita o le sami o le malo o Niu Sila le Manawanui, ua faamaonia nei i se lipoti lata mai a le komiti faufautua a le malo e feagai ma galuega o ni faaletonu i o tatou gataifale ma ogasami e pei o suāuu masaa.
Ua faailoa e lea komiti faufautua e ta’ita’ifono ai le Ofisa Sili o pulega o le matagaluega o galuega tetele a le Malo, e tolu ni vaega o le vaa ua goto i ogasami i Saute o Upolu, ua molimauina e le ‘aumāulu poo divers o loo mama ai i fafo le suāuu.
Peitai e ui ina molimauina lea faaletonu ae ua faailoa i le pepa o faamatalaga o loo faaitiitia i aso uma le mama i fafo o le suāuu.
Ua faaalia i nisi o lipoti e tolu ituaiga o suāuu o loo i luga o le vaa e aofia ai le suāuu kiso ma le hydraulic oil.
Faaalia e le komiti faufautua o le suāuu o loo mama i fafo, o loo sau mai le tane o le vaa e ta’ua o le service tank e tu i le vaega o loo iai le afi lea e iai le talitonuga o le vaega tonu lea o le vaa, na amata ai le afi a o lei goto.
Fai mai le lipoti lata mai o loo iai le talitonuga o se vaega tele o le suāuu o le vaa ua uma ona mu ae o le suāuu o loo mama lea e ta’ua o le residual oil.
O le vaaiga o le suāuu i le vaega i luga o le suāsami poo le sea surface o se vaaiga masani lea pe a iai ni tulaga faapea e aliali mai, ae o loo tafe ese atu i le vasa loaloa ma faaitiitia ai.
O le tafe i uta o ni suāuu i le aloalo ma taunuu atu ai i matāfaga ma nofoaga lauoneone i uta e leai ni vaaiga o ni suāuu o iai.
Sa vaaia e le komiti i le latou galuega lea tulaga i le itula e valu i le taeao o le Aso Tofi o le vaiaso nei.
O le aveesea o le taula o le Manawanui ma pusa tetele poo containers e tolu mai le vaa e pei ona vaaia le tafefea solo i lea ogasami o loo faatalanoa se auala e faatino ai lea galuega ina ia taofia le faaleagaina o amu o le ā’au i gataifale o le nuu o Tafitoala.
O le Aso Tofi foi sa feiloa’i ai sui o le Komiti faufautua ma sui o le afioaga, sa faamatala ai e sui o le matagaluega o puna’oa faalenatura ma si’osi’omaga tulaga i le faatinoina o galuega mo le puipuiamalu o le gataifale o le nuu mai ni aafiaga e mafua i le vaa ua goto i ogasami o lea faaitu o le motu o Upolu.
Sa auai i lea feiloa’iga ma se ofisa maualuga o le fitafita o le sami o le malo o Niu Sila o ia lea o Commodore Andrew Brown.
