Ua faamaonia ma faalauiloa aloa’ia mai e le itumalo o Selwyn i Canterbury le faamalosia o le iai o lea itu i lalo o poloa’iga o faalavelave faafuase’i, ona o tulaga ogaoga ua iai le loulouā tele o le tau. 

Ua lipotia mai le faaauau ai ona mata’itūina e le ofisa o le vaaitau o suiga eseese o le tau, ae o le tuuina atu o fautuaga o timuga mamafa mo Gisborne, o itu i Sasa’e o le Bay of Plenty, o Kaikōura, Canterbury e aofia ai Christchurch ma le Banks Peninsula. 

O loo faamauina le faaauau ai o le mata’itūina foi o matagi malolosi mo faaitu o Aukilani, Great Barrier, Coromandel, o le itu i Matu o Waikato i Hamilton, Wairarapa, Hawke’s Bay, Horowhenua, o le Gataifale o Kāpiti, Marlborough Sounds, Buller, Grey, o itumalo o Westland, ma le Nelson Lakes.

Ma i le vaaia ai o le malosi o le loulouā o le tau o lea ua faamauina ma lipotia mai le faamalosia o lapata’iga mo matagi malolosi mo Ueligitone, ma ua oo ai i le vaega mūmū i le faatulagaga o le mata’itūina o le saogalemu.

Ua ta’ua ai le fautuaina o tagata lautele e tautuanā le saogalemu, ona o loo vaaia le tele o laau pa’ū’ū ma e ono afaina ai se soifua. 

Ona o nei uiga loulouā o le tau, na maitauina ai le motusia faafuase’i o le eletise i nisi o maota ma laoa, ae ua lipotia mai le toe maua ai o le eletise i nisi o aiga. 

Na lipotia foi e le leitio faavaomalo a Niu Sila, ua lē faataunuuina le tele o faigamalaga a le Ea Niu Sila, i le malaga ese ma le malaga atu i totonu o Ueligitone, se’ia maua se tala lata mai pe ono mafai ona malaga vaalele i le aoauli nei.

Ua fautuaina ma tuuina mai foi lapata’iga mo le to’ulu ai o le kiona i auala i faaitu o Lewis Pass, (SH7), Lindis Pass (SH8), Arthur’s Pass, ma Porters Pass i le State Highway 73.
Ua taofia foi femalagaa’iga o vaa la’upasese i le va o motu se’ia pā’ia le Aso Faraile i le aoauli. 

Ua maitauina foi le tapunia ai o le tele o a’oga a fanau.

Puna o Faamatalaga: https://www.rnz.co.nz/news/national/559541/weather-live-state-of-emergency-as-heavy-rain-gales-hit-south-island-wellington