E toaiva tamaitai taaalo fou ua faaaofia i le ‘au a le Black Ferns mo le uluai taimi e aofia ai ma se tamaitai ua 34 tausaga i le tulaga o le prop.
Ua faaailoa i le stuff.co.nz ua faalauiloa aloaia le ‘au a Niu Sila i Hamilton i le aso ananafi.
E toa 30 tamaitai ua filifilia ma o co-captains o le tamaitai o Ruahei Demant ma Kennedy Simon ma ua fuafua o le uluai taaloga a le ‘au i le Pacific Four Series ma le Oreilly Cup e taaalo ai ma Ausetalia i Brisbane i le agai atu i le faaiuga o le masina nei.
O se tasi o alo o Samoa le tamaitai talavou o Sylvia Brunt 19 tausaga e aupito laititi ai i le ‘au ae o le isi tamaitai fou ua faaopopo ane o Kate Henwood ua 34 tausaga o lona soifua.
O tamaitai taaalo fou ua faaopoopo i le ‘au e aofia ai Esther Faiaoga Tilo, taalo i le tulaga o le prop ma sa taalo foi i le Hurricanes Poua, Grace Gago mai Counties Manukau, taalo i le tulaga o le hooker, Iritana Hohaia taalo i le tulaga o le ‘afa ma e agai mai Taranaki, Kate Henwood o le prop mai Whakatane, Katelyn Vahaakolo o le outside back o le tamaitai sa taalo i le Auckland Storm i le tausaga talu ai, Lucy Jenkins o le loose forward mai Canterbury, Mererangi Paul o le outside back mai Counties Manukau, Rosie Kelly o le first five sa taalo foi mo Canterbury, Tenika Willison o le outside back foi lona tulaga ma sa taalo i le Chiefs Manawa.
