Ua faailoa e le Minisita o le Matagaluega o Tina ma Tamaitai Atinae o Afioaga ma Aga Fesoota’i le faipaaga ai o le Malo i lana atina’e o le miliona tala, ma le Faletupe o le Lalolagi i le isi lima tausaga o lea polokalame o le atina’eina o itumalo faapalota e 51 o le atunuu.
E 22 miliona tala tupe Amerika poo le silia i le 50 miliona tala Samoa e maua ai, o le a faamatuu mai o se foa’i poo se grant mo lea taumafaiga a le malo i totonu o le lima tausaga.
Faailoa e le tamaitai minisita o lea matagaluega o loo iai le faagaioia o le poloketi tasi le miliona le afioga Mulipola Anarosa Ale Molioo, o le mae’a o se sa’ili’iliga a le Faletupe o le Lalolagi i le amataga o le tausaga nei sa aga’i i le tulaga o loo faatino ai atina’e a le malo, na ia maua ai se tusi mai lea faletupe ua faailoa ai le faafiafiaina i le poloketi o le miliona, ona o le silasila a le Faletupe o le Lalolagi o Samoa le atunuu muamua ua mafai ona ia faatino se polokalame faapea e tau fai galulue faatasi ai le malo ma tagata o nuu ma afio’aga i itumalo faapalota.
O le finagalo o le Minisita i le feiloa’iga faai’u o lenei tausaga ma tusitala sa ia faailoa ai foi ina ua fesiligia, e tusa ma le 43 Fono Faavae ua mae’a tuuina atu le latou ioega e auai i le tasi o tapenaga ua tuu atu i itumalo latou te faatinoina, o le filifilia lea o tagata mai o latou nuu ma afio’aga e talafeagai ona ave iai avanoa i galuega faavaitaimi, lea e tasi le afe tala e lesitala ai le Fono Faavae i le tausaga.
