O le Aso Gafua o le vaiaso nei sa faatulaga e lauina ai se faasalaga o le leoleo asiasi le susuga Li’o Faataumalama Auava ma le leoleo taai lua o Henifa Bryce lea ua faamaonia nisi o o la moliaga sa molia ai i le faamasinoga a leoleo.
O le Aso Faraile ua mavae na aumai ai le faaiuga i le faamaonia o moliaga e tolu o Li’o ae tasi mo le tamaitai leoleo taai lua.
O le Aso Gafua lava o lenei vaiaso na tusi atu ai i le Komesina o leoleo, le loia KC o loo tulai mo le leoleo asiasi, ma faailoa iai e lē tatau ona lauina se faasalaga se’i vaganā ua logo muamua o ia e tusa ai o aiātatau o le leoleo asiasi o loo molia, lea o loo aiaia i le Vaega 37 o le tulafono faatonutonu o galuega a leoleo le Police Service Regulation.
Talu ai le tāua o lea aiaiga e ao ai ona faia sana folasaga poo se submission o ia o le loia mo lē o loo tuua’ia e fua iai se togisala.
Ua lē talia ai e le loia KC o Phillip Morgan le lauina o le faasalaga i le 2 o le aoauli o le Aso Gafua o le vaiaso nei, ae ua tolopo atu ai nei i le Aso Faraile 31 o Me.
O le Komesina o leoleo sa molimau i le faamasinoga o le leoleo asiasi ma le leoleo taai lua, ma talu ai lea tulaga ua ia lē faia ai le faaiuga o se togisala, ae ua tuuina atu le faia o se faasalaga i se tasi o leoleo sinia o se sui komesina.
O loo fautuaina e le loia a le leoleo asiasi le Komesina ina ia tuuina atu faamaumauga o loo faavae ai le faaiuga ua taunuu iai suesuega o moliaga ma faamaonia ai nisi o tuua’iga.
E tāua ia faamaumauga e tapena ai le folasaga a le alii loia a o lei aumaia se faasalaga.
