Ua faailoa i lipoti se faamatalaga mai le Heart Foundation e leai lava se aofai o se avamalosi e te taumafaina e lelei mo lou fatu e aofia ai ma se ipu o le uaina mumu ma e ao lava ona faaitiitia lea tulaga.
Na ta’ua e le One News o le faamatalaga sa faamatuu mai le Heart Foundation i le asō ua fua i luga o se suesuega sa faia ma taiala faavaomalo.
Fai mai le faatonu o le Heart Foundation o Dr Gerry Devlin, poo fea lava o faatulaga ai oe i le fua o le taumafaina o le avamalosi, e sili atu lava ona faaititia.
O nisi o talitonuga taatele faapea o le inumia o le uaina mumu e lelei mo le fatu e leai sona faavae i faamaoniga faasaienisi e pei ona faailoa e le Federation i lea lipoti, ma ua faailoa foi ua iai nei faamaoniga ua iloa ai o soo se ituaiga avamalosi e taumafaina e faatetele ai lamatiaga i le fatu.
Ua saunoa foi Dr Devlin o faamatalaga fou ia ua faailoa mai ua atili manino ai tulaga i aafiaga o le avamalosi ma o faamaoniga fou ia ua iloa ai e siitia foi le lamatiaga i le maualuga o le toto, o se tasi lea o mafuaaga tugā mo le gasegase o le fatu ma le stroke.
Fai mai le Foundation e iai le avanoa e faaleleia ai le tulaga o le soifua maloloina o le tagata pe a faaitiitia le taumafa i le avamalosi auā o le 20 pasene o tagata matutua i Niu Sila o loo aafia i le toto maualuga.
