Ua talia e le Komiti Faafoe o le poloketi o le miliona tala le fautuaga a le Loia Sili ina ia toe ave i le komiti o le Fono Faavae a le itumalo faapalota a Lepa le 96 afe tala na taofi, ona o le lē tausisia e lea Fono Faavae o aiaiga na sainia ai le maliega i le faamatuuina o ulua’i vaegatupe ta’i 200 afe o le poloketi o le tasi le miliona.
O le 96 afe na totogi ai le lisi o le ofisa o le Fono Faavae mo tausaga e lima, peitai o le aiaiga e pei ona faailoa e le minisita o loo gafa lana matagaluega ma le vaaia o le poloketi, e ta’i tausaga ma totogi le lisi.
O le vaegatupe e 175 afe tala o loo fesiligia lona faaaogāina e le komiti o le Fono Faavae a le itumalo o Faasaleleaga Numera 2, ua faailoa e le minisita le afioga Mulipola Anarosa Ale Molioo, ua taatia atu i le matagaluega o tupe e iai se tusi e faamatala atu ai le faaaogāina o lea seleni, ona avatu lea i le Komiti Faafoe o le poloketi e talanoaina ma faia iai se faai’uga.
O lea tusi a le matagaluega o tupe o loo ave muamua i le Loia Sili e silasila iai, ona faato’ā momoli ai lea i le ta’ita’ifono ma le komiti o le Fono Faavae a Faasaleleaga Numera 2.
