O le feagai ai o le pulega o le Lakapi Samoa ma faafitauli tau tupe ua mafua ai ona taofia le fuafuaga e malaga taamilo le tatou aulakapi o le Manu Samoa i Europa e pei ona iai le talitonuga o se taimi o le tausaga nei sa fuafua e faatino ai.
O le afea o Samoa e sui o le pulega o le taaloga i le lalolagi i le masina o Iulai na faatalanoa ai lea fuafuaga ma le pulega o le Lakapi Samoa lea e aofia ai le Komiti Faafoe poo le Board.
Peitai o le aso 11 o Iulai na ave ai le tusi a le ta’ita’ifono o le Komiti Faafoe le susuga Tuilaepa L Sailele Malielegaoi i le ta’ita’ifono aoao o le lakapi a le lalolagi le afioga Tootoootumua Sir Bill Beaumont, ma logo iai le faai’uga ua faia e taofi le malaga a le Manu Samoa ona o faafitauli tau tupe.
O loo faaalia e le ta’ita’ifono i lana tusi i le ta’ita’ifono o le lakapi a le lalolagi, e lē toe fia tepa i faafitauli tau tupe sa aafia muamua ai le lakapi i lo tatou atunuu, ma o le faai’uga ua faia e taofia ai le avea o Samoa o se iuni a se atunuu laititi ae faalumaina i se gau e aafia ai poo le bankrupt.
E ui i ia tulaga faigata tau tupe o loo feagai ma le Lakapi Samoa ae o loo faaalia e le ta’ita’ifono i lana tusi o loo tumau pea le lagolago i polokalame uma mo le uuna’ia o le tulaga lelei o le lakapi i lo tatou atunuu.
Ua faailoa atu foi i le ta’ita’ifono o le pulega o le lakapi a le lalolagi e le ta’ita’ifono o le komiti faafoe o le Lakapi Samoa le silasila ane o le pulega o le taaloga i nisi auala e mafai ona fesoasoani ai i atunuu e pei o Samoa i le atina’eina lava o le lakapi.
E pei ona silafia o se tasi o tapenaga o loo feagai nei ma le pulega o le taaloga i Samoa o le faamanatuina o le 100 tausaga talu ona oo mai le taaloga lakapi i o tatou laufanua.
