I le mae’a ai o le tatalaina aloaia o le Samoa Games i le masina ua mavae na amatalia ai le tele o taamilosaga a taaloga taitasi e tapenapena ai mo le faamoemoe tele o taaloga a le Pasefika i le tausaga nei.
O le mae’a ai o lenei faamoemoe ua faafetaia ai e le Faalapotopotoga o Taaloga i Samoa e ala i se pepa o faamatalaga e faafetaia ai le lagolagosua a le atunuu e pei ona iai le Malo e tauala i lana Matagaluega o Aoga Taaloga ma Aganuu mo le faatupeina aemaise o le ofisa o loo gafa ma fale taalo i le atunuu mo le avanoa i le mamalu o le atunuu e molimauina ai nei taaloga e aunoa ma se totogi.
I le tulaga o le saogalemu lautele a o feagai ai ma taaloga na faafetaia ai foi le Matagaluega o Leoleo faapea le Pulega o Tineimu ma Faalavelave Faafuasei.
E 22 taaloga sa faatinoina a latou taamilosaga e tusa ai ma lenei faamoemoe e aofia ai le lakapi, netipolo, kirikiti, lakapi liki, afeleti, tenisi ma isi.
Na faafetaia ai foi au taaalo uma aemaise o le lagolagosua a o latou aiga.
O le taimi nei o loo faagasolo pea le filiina o nisi o ‘au mai ia latou toleniga o loo faatinoina.
O le masina o Novema o loo fuafua nei mo le faatino ai o taaloga a le Pasefika i le Atu Solomona.
