Ua mou mālie atu le 12 masina sa faamanatu ai e le atunuu le atoaga o lona 60 tausaga o le tutoatasi ma o le faafetai lea mai le taitai o le Malo i le atunuu atoa, ona o le talisapaia ma lagolago i le finagalo o le Malo e auai tagata uma e ala i le sao o nuu ma itumalo i le faamanatuina o ia tausaga e tele, ma toe tepa taulai ai i le amataga o le faigamalaga a Samoa i lona uluai tutoatasi, sa gapatia ma olooloia ai tuaa ma mātua ua lagomau i tiasa ma tuugamau.
O le saunoaga mai le taitai o le Malo le tamaitai Palemia na taualuga iai polokalame o le 60 tausaga i le sauniga i le afiafi o le Aso Lulu i le malae o le faautugatagi a Samoa, a o lei goto le la ma toe oso a’e i le taeao fou o le aulia o le 61 tausaga o le tatou malo tutoatasi.
Se vaega o le saunoaga mai le taitai o le Malo le afioga i le tamaitai Palemia, afioga Fiame Naomi Mataafa.
