Ua mae’a ma le manuia le fonotaga a ta’ita’i o malo o le taupulega sa talimalo ai Samoa I le vaiaso na te’a nei.
I le faatalanoaga a le TV1 ma le Komesina o Leoleo o Auapaau Logoitino Filipo na ia momoli ai le faafetai i le saofa’iga a alii ma faipule o afio’aga ta’itasi aemaise o le atunuu atoa i le lagolago i lea foi faamoemoe.
E lē gata i lea ae na momoli foi le faamālō i alii ma tamaitai leoleo na malaga mai atunuu o le Pasefika i le tuu mai o lo latou tau’au e fesoasoani i le faatinoga o le galuega.
Faaalia e Auapaau o le taligamalo a Samoa mo le fonotaga i le vaiaso na te’a nei, o le pine faamau lea o le mafai e Samoa ona talimalo i soo se fonotaga faavaomalo i le lumana’i, ma o se agaga faagaeetia na faaleo e le Komesina.
Ua amata toe foi isi leoleo na malaga mai e pei o Niu Sila ma Tonga, ae o isi o le a malaga i le faai’uga o le vaiaso ma o loo tolaupi pea i le nofoaga o leoleo i Tafaigata.
Faaalia foi e Auapaau o le ta’utinoga a nisi na malaga mai, ua tumati’e Samoa ona o le mafai ona talimalo ma o le afuaga o le i’u manuia o le fonotaga ona o le lagolagosua a tagata uma.
E le’i iai se faalavelave na tula’i mai i le vaiaso na te’a nei a o talimalo ai le atunuu.
