Ua silia ma le vaiaso talu ona maea palota laiti mo itumalo e 6 i le sailia lea o ni o latou sui faipule mo le Palemene, ma ua faafeiloai atu ai e le vaega faaupufai e Puipuia Aia Tatau o Tagata i o latou sui faipule fou e to’afa. 

O i latou nei e aofia ai sui faipule e toalua na manumalo mai fagapalota laiti  le afioga ia maulolo Tavita Amosa lea na manumalo mai i le itumalo a Sagaga No.2 i palota e 677, ma le aifoga ia Aiono Tile Gafa na manumalo mai i le itumalo Aana Alofi No.2 i palota e 412. 

O isi sui e toalua o sui faaopoopo o nofoa o tamaitai e atoa iai le 10% i totonu o le Palemene lea ua filifilia ai le afioga ia Aliimalemanu Alofa Tuuau mai le itumalo o Alataua i Sisifo i pasene e 40.03 mai palota e 464 na maua mai i le palota tele na faia i le masina o Aperila ma le tamaitai ia Faagasealii Sapoa Feagiai o le itumalo o Alepata Itupa i Lalo i pasene e 35.91 mai palota e 642 na maua i le faigapalota laititi faatoa maea nei. 

Na molimauina lenei faamoemoe e le vaega faaupufai e Puipuia Aiā Tatau o Tagata le HRPP ae le gata i lea o ona tagata lagolago, o paaga ma uo mamae.